മലപ്പുറം: ജാപ്പനീസ് മസ്തിഷ്ക ജ്വരം ബാധിച്ച കുട്ടികൾക്ക് അപസ്മാരം, ബൗദ്ധിക വൈകല്യം, നാഡീസംബന്ധമായ തകരാറുകൾ തുടങ്ങിയ ദീർഘകാല സങ്കീർണതകൾ സുഖം പ്രാപിച്ചതിനുശേഷവും ഉണ്ടാകാമെന്ന് ആരോഗ്യ വകുപ്പ് മുന്നറിയിപ്പ് നൽകി. 15 വയസ്സിന് താഴെയുള്ള കുട്ടികളിലും 60 വയസ്സിന് മുകളിലുള്ളവരിലുമാണ് ഗുരുതരമായ ലക്ഷണങ്ങൾ കൂടുതലായി കാണപ്പെടുന്നത്. ഈ സാഹചര്യത്തിൽ, ജാപ്പനീസ് എൻസെഫലൈറ്റിസ് വാക്സിൻ കുട്ടികൾക്ക് ശക്തമായ സംരക്ഷണം നൽകുന്നുവെന്നും മലപ്പുറം ജില്ലാ മെഡിക്കൽ ഓഫീസർ വിളിച്ചുചേർത്ത വാർത്താസമ്മേളനത്തിൽ പറഞ്ഞു.
