തിരുവനന്തപുരം: കേരളത്തിൽ ഈ ആഴ്ച തുടർച്ചയായി ബാങ്കുകൾക്ക് അവധിദിനം വരികയാണ്. സെപ്തംബർ 30- ദുർഗാഷ്ടമി, ഒക്ടോബർ ഒന്ന് – മഹാനവമി, ഒക്ടോബർ രണ്ട് – ഗാന്ധി ജയന്തി എന്നിങ്ങനെയാണ് അവധി ദിവസങ്ങൾ വരുന്നത്.
അടിയന്തര ആവശ്യങ്ങൾക്കായി നേരത്തേ തന്നെ പണമെടുത്ത് സൂക്ഷിക്കേണ്ടത് പ്രധാനമാണ്. ദൂരയാത്ര ചെയ്യുന്നവർ എടിഎമ്മിൽ നിന്ന് ആവശ്യത്തിന് പണം കൈയിൽ കരുതുന്നതും ഉപകാരപ്രദമാകും. നവരാത്രി ആഘോഷങ്ങളുടെ ഭാഗമായാണ് സംസ്ഥാനത്ത് ചൊവ്വാഴ്ച പൊതുഅവധി പ്രഖ്യാപിച്ചത്.
അതേസമയം സർക്കാർ, അർദ്ധസർക്കാർ, പൊതുമേഖലാ സ്ഥാപനങ്ങൾക്കും സംസ്ഥാനത്ത് നെഗോഷ്യബിൾ ഇൻസ്ട്രുമെന്റ് ആക്‌ട് പ്രകാരം പ്രവർത്തിക്കുന്ന സ്ഥാപനങ്ങൾക്കും പ്രൊഫഷണൽ കോളേജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധിയാണ്.