തൊടുപുഴ: എല്ലാ സാങ്കേതിക പോരായ്മകളും പ്രശ്നങ്ങളും സമയബന്ധിതമായി പരിഹരിച്ച് 4ജി, 5ജി വിവര വിനിമയ ശൃംഖലയിലേക്ക് ഇടുക്കി ജില്ലയിലെ ബി.എസ്.എൻ.എൽ സമയബന്ധിതമായി ചുവട് വയ്ക്കുണമെന്ന് നിർദ്ദേശിച്ച് ഡീൻ കുര്യാക്കോസ് എം.പി അറിയിച്ചു. തൊടുപുഴ പി.ഡബ്ല്യു.ഡി ഹാളിൽ ജില്ലയിലെ ബി.എസ്.എൻ.എൽ അവലോകനയോഗം എം.പിയുടെ അദ്ധ്യക്ഷതയിലും, ബി.എസ്.എൻ.എൽ എർണാകുളം സർവ്വീസ് ഏരിയാ പ്രിൻസിപ്പൻ ജനറൽ മാനേജർ ഡോ.കെ.ഫ്രാൻസിസ് ജേക്കബ്ബിൻ്റെ നേതൃത്വത്തിലുമാണ് നടത്തിയത്.
യു.എസ്.ഒ.എഫ് പദ്ധതിയിൽ സ്ഥാപിക്കപ്പെട്ട മൊബൈൽ ടവറുകളിൽ നിന്നുള്ള നെറ്റ് വർക്ക് കവറേജ് സംബന്ധിച്ച് വിശദമായ ചർച്ച നടന്നു.ജില്ലയിലെ വിവിധ സ്ഥലങ്ങളിൽ ബി.എസ്.എൻ.എൽ നൽകി വരുന്ന വിവിധ സേവനങ്ങൾ സംബന്ധിച്ച് പൊതുജനങ്ങളിൽ നിന്നും ഉപഭോക്താക്കളിൽ നിന്നും ഉണ്ടായിക്കൊണ്ടിരുന്ന പരാതികൾ സമയബന്ധിതമായി പരിഹരിക്കുവാൻ അടിയന്തര ഇടപെടൽ അനിവാര്യമാണെന്ന് എം.പി ചൂണ്ടിക്കാട്ടി. 4 ജിയിലേക്ക് മാറ്റപ്പെട്ട ടവർ ലൊക്കേഷനുകളുടെ ഏരിയകളിൽ തദനുസൃതമായ മൊബൈൽ ഫോണും ഡിവൈസുകളും ഉപയോഗിക്കുന്നതിലൂടെ മാത്രമെ ഇപ്പോൾ അഭിമുഖീകരിക്കുന്ന നെറ്റ് വർക്ക് കവറേജ് പ്രശ്നങ്ങൾക്ക് പരിഹാരം കണ്ടെത്തുന്നതിന് കഴിയുകയുള്ളു. 4ജി സാച്വറേഷനിലേക്കും , വോൾട്ട് കോൾ സ്റ്റെബിലൈസേഷനിലേക്കും സാധാരണക്കാരായ ഉപഭോക്താക്കൾ എത്തുന്നതിന് താമസം നേരിടുമെന്നതിനാൽ നിലവിൽ പ്രവർത്തന സജ്ജമായ എല്ലാ ടവറുകളിലും 3ജി കൂടി ഒരു മാസത്തിനുള്ളിൽ താത്ക്കാലികമയി പുനഃസ്ഥാപിക്കുവാൻ പ്രിൻസിപ്പൽ ജനറൽ മാനേജർ നിർദ്ദേശം നൽകി.
കൊക്കരക്കുളം, സന്യാസിയോട, അന്യാർതൊളു, തിങ്കൾക്കാട് ,വാത്തിക്കുടി, പടമുഖം,അമലഗിരി, നല്ലതണ്ണി, മുണ്ടൻമുടി, ഇല്ലിചാരി,മൂന്നാർ, പെട്ടിമുടി, നടയാർ, നല്ലതണ്ണി എസ്റ്റേറ്റ് , കൊളമാങ്കൈ, ദേവികുളം, പഴമ്പള്ളിച്ചാൽ,മാങ്കുളം ,കുറത്തിക്കുടി,വഞ്ചിവയൽ തുടങ്ങി കവറേജുമായി ബന്ധപ്പെട്ട സാങ്കേതിക പ്രശ്നങ്ങൾ ആ പ്രദേശങ്ങളിലെ പഞ്ചായത്ത് പ്രതിനിധികൾ യോഗത്തിൻറെ ശ്രദ്ധയിൽപെടുത്തി. പോരായ്മകൾ നിലനിൽക്കുന്ന ടവർ ലൊക്കേഷനുകളും കവറേജ് ഏരിയാകളും ബി.എസ്.എൻ.എലിൻറെ ചുമതലപ്പെട്ട ഏൻജിനിയർമ്മാരും , സാങ്കേതിക വിദഗ്ധരും , ബന്ധപ്പെട്ട ജനപ്രതിനിധികളുടെ സഹായത്തോടെ 10 ദിവസത്തിനുള്ളിൽ നേരിട്ട് പരിശോധിക്കുകയും തുടർന്ന് പരിഹാര നടപടികൾ സ്വീകരിക്കുകയും ചെയ്യാൻ നിർദ്ദേശം നൽകി.
4ജി, 5ജി സാച്വറേഷൻ സംബന്ധിച്ചും , ബിഎസ്.എൻ.എലിൻ്റെ ഇതര സേവനങ്ങൾ സംബന്ധിച്ചും ജനങ്ങളിൽ അവബോധം വളർത്തുവാനും , പരാതികൾക്ക് പരിഹാരം ഉണ്ടാക്കുവാനും സാങ്കേതിക വിദഗ്ധർ ഉൾപ്പെടെയുള്ള ഉന്നത ഉദ്യോഗസ്ഥരുടെ സാന്നിദ്ധ്യത്തിൽ ജില്ലയിലെ എല്ലാ പ്രധാന സ്ഥലങ്ങളിലും ബി.എസ്.എൻ.എൽ മേളകൾ നടത്തുന്നതിന് നിർദ്ദേശം നൽകി. ജില്ലയിൽ ആകെയുള്ള ടവറുകളുടെ പ്രവർത്തനം അനിദിനം നിരീക്ഷിക്കുന്നതായും , സോളാർ കണക്ഷൻ, ഇലക്ട്രിസിറ്റി , ബാറ്ററി ബാക്ക് അപ് മുതലായവയുടെ പോരായ്മകൾ പരിഹരിക്കുന്നതിന് സത്വര ശ്രദ്ധ നൽകി വരുന്നതായും ബന്ധപ്പെട്ട ഉദ്യോഗസ്ഥർ അറിയിച്ചു. പ്രവർത്തനങ്ങൾ വിലയിരുത്തുന്നതാനായി അടുത്തമാസവും ഇടുക്കിയിലെത്തുമെന്നും 4ജി സാച്വറേഷൻ നടത്തിയിട്ടുള്ള എല്ലാ ടവർ ലൊക്കേഷനുകളും നേരിട്ട് പരിശോധിക്കുമെന്നും , നിർദ്ദേശിക്കപ്പെട്ടിട്ടുള്ള പരിഹാര നടപടികളുടെ നടത്തിപ്പ് സംബന്ധിച്ച് കൃത്യമായ വിലയിരുത്തൽ നടത്തുമെന്നും പ്രിൻസിപ്പൽ ജനറൽ മാനേജർ അറിയിച്ചു.
യോഗത്തിൽ ബ്.എസ്.എൻ.എൽ ജനറൽ മാനേജർ രാജീവ്, ഡെപ്യൂട്ടി ജനറൽ മാനേജർ ചന്ദ്രശേഖർ എം.എൽ, അസി.ജനറൽ മാനേജർമാരായ അശോക്, ശിവശങ്കർ,ഗോവിന്ദ ഗുഡി, സോണി കുര്യൻ തുടങ്ങിയവർ യോഗത്തിൽ പങ്കെടുത്തു. യു.എസ്.ഒ.എഫ് ടവറുകൾ സ്ഥിതി ചെയ്യുന്ന വിവിധ ഗ്രാമപഞ്ചായത്തുകളെ പ്രതിനിധികരിച്ച് പ്രസിഡൻറുമ്മാർ, വൈസ് പ്രസിഡൻറുമാർ, വാർഡ് മെമ്പർമാർ തുടങ്ങിയവർ വിവിധ പ്രശ്നങ്ങൾ യോഗത്തിൻറെ ശ്രദ്ധയിൽ കൊണ്ടുവന്നു.