ന്യൂഡൽഹി: ലോകമെമ്പാടുമുള്ള ഇന്ത്യയുടെ എംബസികളും, കോൺസുലേറ്റുകളും വഴി ചൈനീസ് പൗരന്മാർക്കു ടൂറിസ്റ്റ് വിസ നൽകുന്നത് ഇന്ത്യ പുനരാരംഭിച്ചു. നിയന്ത്രണ രേഖയിൽ വർഷങ്ങളായി നിലനിൽക്കുന്ന സൈനിക സംഘർഷത്തിനു ശേഷം ഇന്ത്യയും ചൈനയും തമ്മിലുള്ള ബന്ധം സ്ഥിരപ്പെടുത്താനുള്ള മറ്റൊരു ചുവടുവയ്പ്പായിട്ടാണ് ഈ നീക്കത്തെ കാണുന്നത്. ലോകമെമ്പാടുമുള്ള ഇന്ത്യൻ നയതന്ത്ര കാര്യാലയങ്ങൾ ഈ ആഴ്ച ആദ്യം മുതൽ ചൈനീസ് പൗരന്മാരിൽ നിന്ന് ടൂറിസ്റ്റ് വിസയ്ക്കുള്ള അപേക്ഷകൾ സ്വീകരിച്ചു തുടങ്ങിയെന്ന് റിപ്പോർട്ടുണ്ട്.
അതേസമയം ഇതുസംബന്ധിച്ച ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല. 2020 ഏപ്രിൽ-മേയ് മാസങ്ങളിൽ നിയന്ത്രണ രേഖയിൽ സംഘർഷം ഉടലെടുത്തതോടെയാണ് ഇന്ത്യ, ചൈനീസ് പൗരന്മാർക്കു ടൂറിസ്റ്റ് വിസകൾ നൽകുന്നത് നിർത്തിവച്ചത്. 2020ലെ ഇന്ത്യ-ചൈന സംഘർഷത്തിൽ 20 ഇന്ത്യൻ സൈനികർക്ക് വീരമൃത്യു വരിച്ചിരുന്നു. ഇതേ തുടർന്ന് ഇന്ത്യയും ചൈനയും തമ്മിലുള്ള ഉഭയകക്ഷി ബന്ധം പതിറ്റാണ്ടുകളിലെ ഏറ്റവും താഴ്ന്ന നിലയിലേക്കാണ് പതിച്ചത്.
പരസ്പര ബന്ധം പുനസ്ഥാപിക്കുന്നതിന് ഇരുപക്ഷവും ‘ ജനോപകാര പദ്ധതികൾ ‘ നടപ്പിലാക്കാൻ തീരുമാനിച്ചിരുന്നു. അതിൻറെ ഭാഗമാണ് ഇപ്പോൾ ടൂറിസ്റ്റ് വിസ പുനരാരംഭിക്കാൻ തീരുമാനിച്ചിരിക്കുന്നത്. നാല് വർഷത്തിലേറെയായി ഇന്ത്യയ്ക്കും ചൈനയ്ക്കും ഇടയിൽ മുടങ്ങിക്കിടന്നിരുന്ന നേരിട്ടുള്ള വിമാന സർവീസുകൾ ഒക്‌റ്റോബറിൽ പുനരാരംഭിച്ചിരുന്നു. അടുത്ത വേനൽക്കാലത്ത് കൈലാസ് മാനസ സരോവർ യാത്ര പുനരാരംഭിക്കാനും ഇരുരാജ്യങ്ങളും സമ്മതിച്ചിട്ടുണ്ട്.